LEGAZPI CITY — Nagpagirumdom an Department of Tourism (DOT) Bicol sa pagsunod sa mga ley na nakakasakop sa pag-aataman kan kapalibutan.
Ini makalihis na mapag-araman na nagkapirang tourist destinations sa rehiyon an nakapagrehistro nin pagbalgar sa environmental codes katakod kan ipigkondusir na inspeksyon asin paglilibot kan ahensya.
Sa intrevista kan Bombo Radyo Legazpi kay DOT Bicol Dir. Benjamin Santiago, kaibanan sa mga nahilingan nin pagbalgar an Sombrero Island sa San Pascual, Masbate asin Calaguas Island kan Vinzons, Camarines Norte.
Sarong operator sana suboot an namamayo sa nasa poco mas o menos walong ektarya kan Sombrero na napag-araman na marine protected area o nagsisirbing hatching ground kan green sea turtles alagad huli sa development sa lugar, naistorbo an nasambitan na mga hayop.
Apwera digdi, wara man suboot na proper waste disposal sa nasambitan na isla na nagkakalot sana kapareho kan problema sa Calaguas na pigkokunsiderar man na ‘eyesore’ kan DOT sa barong-barong na cottages asin kawaran nin cr.
Mientras tanto, nagkaigwa man nin dayalogo an opisyal sa mga concerned local officials mientras na naglalaom na mareresolbaran an problema sa urog na madaling panahon.
