LEGAZPI CITY- Sa karsel an bagsak kan sarong drug personality makalihis an isinagibong buy-bust operation kan mga otoridad sa Calatagan Proper sa banwaan kan Virac, Catanduanes.
Target kan nasabing operasyon an drug surrenderee na si Francesca Bernardine Tabian, 26-anyos na residente kan Brgy. Concepcion sa nasabing banwaan.
Nakumpirmar an iligal na transaksyon ni Tabian makalihis na magkaribayan kan sarong sachet nin pigtutubudang shabu asin buy-bust money mientras na narekober pa sa isinagibong search an pitong medium plastic sachet na katampad an street value na poco mas o menos P10,000.
Mientras tanto, arestado man sa Brgy Gogon Sirangan sa kaparehong banwaan si Jose Villegas III, 31-anyos makalihis na makuhaan nin sarong dakulang transparent plastic na laog an brick kan pigtutubudang dried marijuana leaves na may street value na dae mababa sa P5,000.
Sa presente, nagtetenir na an mga ini sa ngonian sa detention facility kan mga nakakasakop na hepatura kan pulis para sa tamang disposisyon mantang pighahanda naman an kasong kakahampangon kan mga nasabing persona.
Inasegurar man ni PC/Insp. Josefino Titong Jr., hepe kan Virac PNP an padagos na paglaban katakod kan kampanyan kontra sa iligal na droga.
