LEGAZPI CITY- Piglalaomang madudugangan pa an numero kan mga quarry operations sa Bicol region na mali-lift an ibinabang suspension order hale sa Department of Environment and Natural Resources (DENR).
Magigirumduman na liwat na tinugutang makapag-operate an Orophil Stonecraft Corporation kan Baao, Camarines Sur huli ta wara man suboot na maapektarang komunidad sa site en kaso magkaigwa man nin landslide.
Ipighayag ni MGB Bicol Director Engr. Guillermo Molina Jr. sa intrevista kan Bombo Radyo Legazpi na pigtatapos na ngonian na aldaw an review sa assessment and evaluation report kan 20 quarry operations sa Catanduanes kun sain posibleng irekomenda sa nagkapirang kompaniya an pag-lift kan orden ngonian na hapon.
Isusunod na man an review sa mga operasyon kan minahan sa Masbate asin Sorsogon mantang sa Lunes man an pagrebisa sa report kan team sa Albay asin Camarines provinces.
Mientras tanto, napag-araman na dawa kompleto sa permit asin environmental compliance certificate o ECC, ipigduon ni Molina an pagsuspinder kan Ibalong Resources and Development Corporation sa Camalig asin UBS Marketing Corporation sa Legazpi City kan Albay huli sa nagkapirang residente na kaipuhan munang ma-relocate.
Napag-araman na nasa 144 an baseline kan mga operasyon kan quarry sa Bicol asin tulo sa mga ini an nasa large-scale quarrying alagad nadugangan pa suboot ini susog sa isinagibong latest inventory.
