LEGAZPI CITY—Nakisumaro an Kabataan Partylist Bicol asin nagkapirang estudyante kan Bicol University sa ginibong hiro-protesta sa Albay katakod kan ASEAN Summit asin iba pang isyu siring kan Pax Silica Initiative.
Segun ki Earnest Blanquera kan Kabataan Partylist Bicol sa intrevista kan Bombo Radyo Legazpi, maabot sa labi 300 hasta 400 na estudyante an nakisumaro sa aktibidad sa palibot kan unibersidad magin an grupo kan Bagong Alyansa Makabayan, PISTON, asin Organisasyon ng mga Magsasaka sa Albay.
Nagin mainit suboot an atmospera huli sa dakol an narisang kapulisan sa luwas asin laog kan Camp Ola na hampang kan eskwelahan asin pigsusundan an lider kan CONDOR-PISTON magin an pagpalayog nin tulong drones ngani suboot i-surveil an mga estudyanteng nagpoprotesta.
Dugang ni Blanquera na antes pa man an naunambitang protesta nagbabarewas na sinda nin flyers sa mga estudyante na kompwesto nin mga impormasyon asin propaganda workshop nganing pukawon asin maaraman an pulso kan mga estudyante pag-abot sa orolay kan Pax Silica Initiative.
Segun saiya na dae man suboot makikinabang an mga Pilipino sa Pax Silica huli sa puon pa sana warang intensyon an gobierno para sa namamanwaan siring man na an ibang nacion na i-industrialize an Pilipinas.
Afuera man sa dae prayoridad an mga Pilipino, pigtatago man suboot kan gobierno an totoong sitwasyon kan nacion sa paagi nin pagtaklob nin mga darakulang tarpaulin na hiling an squatters area sa Metro Manila na kunwari naresolbaran kan administrasyon an katiosan sa Pilipinas.
Kasunod kan ASEAN Summits kontra man sinda sa pagbisita ni US President Donald Trump sa Pilipinas ngunyan na Martes kaya magpapadagos man an saindang mga paghiro siring kan ibang eskwelahan.
Naglalaom an grupo na napansin an saindang paghiro huli sa bako sana an nasabing unibersidad an nagkundusir nin protesta kundi magin an iba pang eskwelahan sa bilog na nacion.











