LEGAZPI CITY- Nagpahayag suboot nin pagkaalarma sa posibleng magin estado kan paz y orden sa provincia kan Masbate an nagkapirang lokal na opisyal, urog na sa papaabot na pirilian sa Mayo 2019.
Ipighayag ni Atty. Gil Genorga, abogado ninda Batuan Mayor Charmax Jan Yuson asin Vice Mayor Charlie Yuson III, sa intrevista kan Bombo Radyo Legazpi na seryoso an nasabing orolay na dapat na maaraman kan bilog na island province.
Dugang pa ni Genorga na naaalarma sinda sa posibilidad sa kun siisay man na posibleng maisunod asin magin biktima kan mga siring na paghahalughog.
Kun babalikan, ipignigar kan kampo na kabo pagsadiri an mga narekober na armas sa resort asin harong na sinakyada kan mga search team.
Dae man suboot pigdidiscount kan kampo an posibilidad na magbungkaras an election-related violence sa lugar sa siring kaining mga sitwasyon alagad habo man na maparaot an provincia sa mga kaparehong kultura.
Nangapodan pa an abogado na maipahiling kan mga botante an pagigin mature sa pagpili kan mga ikakaag sa pwesto.
Sa ibong na lado, inasegurar kan abogado an pagsusunad nin magkakanigong kaso kontra sa mga mapoprobarang personang responsable sa pig-aakusar na discrepancy kan isinagibong search.
