LEGAZPI CITY- Magtatao ngunyan nin konsiderasyon an Task Force Kaayusan Legazpi sa nagkapirang mga eskwelahan asin unibersidad na magkokundusir nin moving up asin graduation ceremonies.
Ini an sa tahaw kan padagos na pag-clamp kan ahensya sa mga behikulo na iligal na naka park sa gilid kan mga tinampo asin nagigin obstruction.
Segun ki Task Force Kaayusan Legazpi head Andy Marbella sa intrevista kan Bombo Radyo Legazpi na kinakaipuhan sanang magsuray sa lokal na gobierno kan Legazpi asin sa saindang opisina ngani na maibitaran na matawan nin penalidad an nasabing mga behikulo.
Napag-araman na sa presente igwa ng eskwelahan na nag-request na paramientas na magamit bilang parking space an bike lane harani sa saindang lugar katakod kan isasagibong moving up ceremonies.
Sinierto man kan opisyal na igwang mga Public Safety Officers asin mga kapulisan na magmamando sa bulos kan trapiko ngani na dae maka ulang sa iba pang mga motorista.
Marurumduman na sa presente kaya, mas pinahigot pa an pagdadakop asin pagi-isyu nin ticket sa mga nagiging obstruction sa gilid kan mga barangay asin national roads.
