LEGAZPI CITY–-Nakaeksperyensya nin pagbabaha an nagkapirang lugar sa probinsya nin Sorsogon huli kan namamateang shearline sa probinsya.
Segun ki Engr. Raden Dimaano, an pamayo kan Provincial Disaster Risk Reduction and Management Office Sorsogon, sa intrevista kan Bombo Radyo Legazpi, na maabot sa sampulong lugar an naapektaran kan baha na kun saen tulos man sanang huminupa makalihis an nagkapirang oras.
Dugang digdi, pig-monitor man kan saindang ahensya an banwaan kan Pilar asin Donsol na nakaeksperyensya man nin pagbaha kun saen sinabi kaini na nakaapektar o nakadugang man sa baha an upstream na tubig gikan sa probinsya kan Albay.
Mientrastanto, passable na man an nagkapirang lugar siring kan Maharlika road na binaha man suboot dara kan pag-uuran asin paghalangkaw kan hukol sa kadagatan.
Sinabi kaini na bandang hapon nagin normal na man suboot an kamugtakan sa mga nasambit na lugar asin passable na man an mga ini.
Abiso man kan opisyal sa mga kahimanwa na kun makaeksperyensya nin makukusog na pag-uuran tulos na magbaebakwar para sa saindang kaligtasan.
