LEGAZPI CITY—Nakapagrehistro nin pagbaha an nagkapirang lugar sa banwaan kan Mobo, Masbate, makalihis an mga pag-uuran na dara kan shearline.
Segun ki Municipal Disaster Risk Reduction and Management Office Mobo Richard Lupango, sa intrevista kan Bombo Radyo Legazpi, nakapagrehistro nin orange level na tubig-baha sa sarong salog sa saindang lugar magin sa Barangay Polot.
Pagdugang kaini na peligroso an saindang lugar sa baha huli sa yaon sainda nakabugtak an mga pinakadarakulang salog sa Masbate.
Dugang kan opisyal na wara man na iniebakwar na mga residentes makalihis ini, asin wara man na naapektaran sa paghalangkaw kan baha o magin landslide.
Nagpagiromdom man an opisyal sa namamanwaan na magtinir na nag-aantabay sa mga presenteng kamugtakan kan panahon nganing makapagpreparar sa gigibohon na mga masunod na lakdang para sa saindang kaligtasan.
