LEGAZPI CITY — Nanindogan an sarong abogado asin Bikolanong lehislador na impeachment proceeding pa man an dapat na ipaotob para sa sarong impeachable official siring kan sitwasyon ngonian ni Supreme Court (SC) Chief Justice on-Leave Ma. Lourdes Sereno asin bako an quo warranto petition.
Ipigduon ni Ako Bicol Partylist Representative Alfredo Garbin Jr. sa intrevista kan Bombo Radyo Legazpi na dae ini nagtutubod na mahahale si Sereno sa quo warranto petition.
Klarado man ining nakasaad, segun ki Garbin sa Article 11 kan Konstitusyon kaya’t tama sana na isairarom si Serento sa impeachment en kaso matanos nang madiskutir an articles of impeachment sa Kongreso.
Ipig-ehemplo pa kaini an nangyari apat na taon na an nakakalihis sa pagpapatalsik ki dating SC chief justice Renato Corona sa paagi kan impeachment.
Magigirumduman na enot nang ipighayag ni Solicitor General Jose Calida na sala an appointment ni Sereno na maitatama sana sa paagi kan quo warranto petition.
Sa presente, nagpapadagos pa an oral argument sa quo warranto petition sa en banc session kan Korte Suprema sa Baguio City.
