Hinali an pirang kanta ni Taylor Swift sa mga video sa social media ipinost kan kampanya ni US President Donald Trump asin kan White House, na naggamit nin duwa sa mga kanta kan American superstar sa nakalihis na mga semana.
Wara pa man na kasimbagan an White House asin an representante ni Swift para sa kahagadan nin komento.
Sa presente, dae pa nagtataram si Swift mapadapit ki Trump, alagad inendorso niya an Democratic rival kaini na si dating Vice President Kamala Harris kan 2024.
Pauro-utro na tinuyaw ni Trump si Swift makalihis niyang i-endorso si Harris.
Kabale man sa mga artista siring ni Sabrina Carpenter asin Ariana Grande, an nangapudan sa administrasyong Trump na dae paggamiton an saindang mga kanta.
Naggamit an kampanya ni Trump nin duwang kanta ni Swift kan nakalihis na semana sa sarong social media page kabale an may caption na Red (Donald Trump’s Version) magin an saiyang kanta na ‘august’.
Kan Hunyo, nag-post ang kampanya ni Trump nin sarong video sa short-video platform kaiba an bagong kanta sa “Toy Story 5” na kinanta ni Swift na may titulong “I Knew It, I Knew You.”
An communication team ni Trump an nag-post nin manlaen-laeng mga hit na kanta na mya mga ladawan kabale an immigration crackdown kan presidente, mga operasyon militar kan US kontra sa Iran asin an pag-arestar sa dating presidente kan Venezuela na si Nicolas Maduro.
