LEGAZPI CITY — Uminatras na an nagkapirang kandidato sa probinsya kan Sorsogon na madalagan kuta sa barangaya asin Sangguniang Kabataan (SK) elections makalihis na mapabali an saindang pangaran sa barangay level narco-list.
Sa intrevista kan Bombo Radyo Legazpi kay Sorsogon PPO Director S/Supt. Marlon Tejada, sa 105 na incumbent asin aspiring officials na kaibanan sa nasambitan na listahan na ipinaluwas kan Philippine Drug Enforcement Agency (PDEA), dakulang numero na man an nag-withraw nin candidacy.
Segun digdi, aram kaya kan mga ini na wara man na silbi an saindang pagal kun ipagpapadagos pa an pangangampanya huli ta mapapatalsik man sana an mga ini sa pwesto oras na mapatunayan na imbwelto sa kalakaran kan iligal na droga.
Mientrastanto, mahigot man ngunyan an pigigibong panbabantay kan PNP asin Armed Forces of the Philippines sa nagkapirang barangay sa probinsya na kaibanan sa areas of immediate concern.
Pag-eksplikar kan opisyal, igwang presensya nin armed goups sa barangay na kaibanan sa category 2 asin 3 siring kan ng rebeldeng New People’s Army (NPA) na may mga pigsusuportaran na kandidato.
Segun digdi, pig-iibitaran kan tropa kan gobyerno na magkaigwa nin kadahasan sa pahanon kan kampanya ngani na magkaigwa nin matoninong na pirilian.
