LEGAZPI CITY – Kinumpirmar kan mga Filipino sa Qatar na may mga naarestar na satuyang mga kababayan sa nasambitang nacion huli sa pagsasagibo nin ilegal na pagtitipon.
Magigirumduman na naenot nang kinumpirmar kan Embahada kan Pilipinas sa Doha, Qatar na may nagkapirang mga Pilipino an inaresto asin ikinulong sa nasabing Arab country huli sa bako otorisadong pagsasagibo nin political demonstrations.
Segun ki Bombo International News Correspondent in Qatar Dennis Mota na may mga nakulong huli sa pagsasagibo nin mga politikal na pagtiripon asin protesta na warang permiso kan mga otoridad na pigkukuwa sa local offices.
Dae man pigtataram sa ngonian an eksaktong numero kan mga pilipinong naarestar sa paggigibo nin political demonstration.
Pigtaram pa kaini na pinagbabawal sa nasambitang nacion an pagsasagibo nin hiro protesta huli ta mahigot na ipigpapaotob an mga aktibidad urog na kun wara ining magkakanigong dokumento asin rekisitos.
Tulos na pig-aarestar an sisay man na mabayolar huli ta maski bako politikal an tema kan mga pagtiripon, mapa banyaga man o mga Qatari citizens.
Dae man masabi kaini kun may kinaaraman sa mahiwasang protesta na isinagibo kasabay kan ika-80 na kumpleanyo ni dating Presidente Rodrigo Duterte.
Sa pagkaka-aram niya, deportation an magigin magabat na padusa sa mga mabayolar na mga banyaga na madadakop nindang nagsasagibo nin ilegal na pagtitipon.
