LEGAZPI CITY- Sinierto kan lokal na gobierno kan Camalig, Albay na napapangatamanan nin matanos an mga Mayon evacuees sa banwaan.
Ini an katakod kan nagkapirang semana ng pag-aalburuto kan bulkang Mayon.
Segun ki Camalig local government unit Spokesperson Tim Florece sa intrevista kan Bombo Radyo Legazpi na urualdaw man na igwang mga nareresibeng donasyon an banwaan hali sa mga partner agencies kaya nasusustiner an pangangaipo kan mga ipig-ebakwar na residentes.
Sa ibong kaini, aminado an opisyal na nagtetenir na problema an mga residentes na nagpipirit na mag-uli sa saindang mga harong huli sa mga ataman na hayop asin balikan an kabuhayan.
Alagad sinabi ni Florece na igwa man na lugar na pwedesir na pagdarahan kan saindang mga ataman sa luwas kan 8km extended danger zone mantang an ibang residente an pigsasairarom man sa training ngani na magkaigwa nin pansamantalang kabuhayan.
Kaibanan sa mga ini an bread making, handicraft making asin iba pang mga programa.
Sa paagi kan nasabing mga livelihood programs, nagtutubod an opisyal na maski papano magkakaigwa nin panggastos an mga ini mantang sinda na nasa evacuation center.
