LEGAZPI CITY — Na-trauma an nagkapirang Grade-4 students sa Budiao Elementary School makalihis na magunutan asin magmudahan sa hampangan kan mga ini an duwang maestra.
Segun sa dae na pinangaranan na estudyante, haros nagkapirang aldaw man sindang dae naglaog sa eskwelahan huli na man sa takot na saindang namatean.
Napag-araman na pagkaputol sana nin wire nin laptop an pinag-ugatan kan iwal kan dae na pinangaranan na mga maestra.
Pagsalaysay kaini, mabakal sana sinda nin pagkaon kaibanan an mga kaklase kan nabigla sinda sa ginibong pagkukulugan kan saindang mga paratukdo.
Dugang pa kaini na binalo man ninda na awaton an duwa alagad dae man giraray ini nagpundo asin huli sa takot, nagdesisyon sinda na maghagad na nin tabang sa mga tanod.
Segun pa sa nasambitan na estudyante, dae dapat na ginibo kan mga mga ini an siring na gawi huli ta sinda mismo an nagtutukdo na dae makipag-iwal asin pigtuturo an tama asin sala sa laog kan eskwelahan.
Nagkaigwa na man nin pag-orolay sa barangay an mga imbweltong persona asin naareglo na man an sitwasyon kaibanan an mga representante kan DepEd.