LEGAZPI CITY-Nasamsam kan National Bureau of Investigation (NBI) an nagkapirang ‘confidential’ na mga dokumento sa condominium unit ni dating Ako Bicol Party-list Representative Zaldy Co.
Enot na man na pigduman kan opisina an saro sa mga condo para sa lubos na inspeksyon, pagkatapos na an korte magpaluwas nin sarong orden.
Segun sa NBI Officer In Charge Atty. Lito Magno, dae pwedisir ipaluwas sa publiko an mga kontrobersyal na dokumento sagkod dae pa maisasagibo an pormal na pagdangog.
Padagos an inspeksyun kan ahensya hasta sa 14 aldaw sa nasabing lugar kaiba an nagkapirang court personnel magin ang abogado ni Co.
Limitado man an inspeksyun sa mga items sa plain view, mantang kinakaipuhan an separadong warrant ngani mabuksan an nagkapirang vault.
An nasabing condo an enot nang binisto ni dating Marine Sergeant Orly Guteza na iyo suboot an lugar kun sain pighahatod suboot an mga maleta na may laog na kickbacks ni Co hale sa flood control projects.
Pigbisto man ini kan dating Bulacan district engineer na si Henry Alcantara bilang drop-off point kan dakulang kantidad nin kwarta para sa dating kongresista.
Segun sa NBI, parte an operasyon liwat kan padagos na paghanap asin pagkolekta nin mga ebidensya hale sa nabuyagyag na kurapsyon sa mga flood control projects.
Marurumduman na kabale si Co sa enot na batch kan mga kontratista asin mga opisyales kan Department of Public Works and Highways na kinasuhan asin pig-isyuhan nin manhamiento de aresto huli sa suboot pag-imbwelto sa korapsyon sa nacion.
