LEGAZPI CITY- Suportado kan nagkapirang bokal sa Junta Provincia kan Albay an kamawotan ni Albay 3rd District Board Member Pem Imperial na paimbestigaran an pigsasabing korapsyon sa quarry operations sa provincia.
Enot nang nagsagibo nin privilege speech sa konseho si Imperial sa pigsasabing poco mas o menos P30 million na nakolekta sa ipigpapatong na presyo sa prevailing price na P50 per cubic meter kan mga aggregates o quarry materials sa laog nin anom na bulan.
Alagad sinabi ni 1st District Board Member Job Belen sa intrevista kan Bombo Radyo Legazpi na kaipuhan na makapagresentar an kapwa bokal nin complainant na ma-substantiate kan mga ipigdulog na impormasyon.
Dugang pa ni Belen na mantenidong hearsay an mga ibinuyagyag kan opisyal kun mapalyar an pagtataong-ebidensya sa mga reklamo.
Kinontra man kan opisyal an pighahagad ni BM Pem na interbensyon kan National Bureau of Investigation (NBI) sa pagbusisi kan alegasyon urog na nasa hurisdiksyon pa ini kan junta.
Katakod kaini, mawot ni Belen na hilingon ini kan kan komitiba na ‘as a whole’ asin imbitaran an magkakanigong resource persons sa pagpapaliwanag.
Mientras tanto, dae pa man maaraman sa ngonian kun nuarin pupunan an nasabing imbestigasyon urog na naka-indefinite recess an junta makalihis na magkainitan sa deliberation period sa nagin session kasuodma.
