LEGAZPI CITY-Nairehistro kan Department of Health (DOH) na nagkapira sa mga biktima kan paputok an nagsapo nin paso asin naputulan nin guramoy makalihis na masabugan sa magkahiwalay na insidente.
Segun sa ahensiya, sarong 8-anyos na joven an nalagasan nin hintuturo asin hinlalaki kan masabugan nin whistle bomb mantang an sarong biktima na 16-anyos naputulan man nin duwang guramoy makalihis na masabugan kan 5-star.
Basado sa huring datos kan ahensya, nagsapo nin malain-lain na lugad asin paso sa magkakaibang parte kan saindang hawak an gabos na 57 nairehistrong biktima kan paputok poon kan Disyembre 21 sagkod Disyembre 26 sa presenteng taon.
Mantang mas hababa ini nin 49% kumpara sa 112 na kasong nairehistro sa parehong panahon kan taong 2024, liwat na nagpagirudom an Department of Health sa peligrong kawsa kan mga paputok, iligal man o legal an mga ini.
Patanid man kan ahensiya na tulos darahon sa ospital kun may aksidente huli sa paputok asin pwedisir na mag-apod sa National Emergency hotline 911 para sa tulos na atensyong medikal.
