LEGAZPI CITY- Nakapagrehistro nin mga minor landslides asin mga pagbaha sa nagkapirang barangay sa ciudad kan Legazpi huli sa mga pag-uran sa lugar.
Segun ki Legazpi City Mayor Alfredo Garbin Jr. sa intrevista kan Bombo Radyo Legazpi na inalerto na an mga opisyal kan barangay asin pinayuhan na mag-ebakwar kun kinakaipuhan.
Obheto kaini na dae na malaag pa sa alanganin an buhay kan mga nasa low lying areas asin an mga nagtetenir harani sa river channels.
Napag-araman na nakapagrehistro man nin minor landslide sa Purok 1 kan Barangay Buraguis kaya paramientras na kinordon an lugar.
Pigpapalikay man an mga motorista sa pag-agi sa lugar urog pang pigkakahaditan na magpadagos an pagrasay kan daga kun magpapadagos an mga pag-uran.
