LEGAZPI CITY- Isinairarom naman sa mandatory evacuation an apat pang barangay sa banwaan kan Daraga sa Albay katakod kan paghadit sa mga pagbaba kan lahar deposits na natipon sa mga nakalihis na pag-aalburoto kan Bulkang Mayon.
Enot naman na pina-evacuar an mga residente sa Brgy. Matnog, Bañadero, Alcala asin Mi-isi.
Sa intrevista kan Bombo Radyo Legazpi ki Municipal Disaster Risk Reduction and Management Office (MDRRMO) Daraga head Alex Comia, nadugangan pa ini ngonian na aldaw kan apat pang barangay sa Binitayan, Tagas, Malabog asin Busay.
Pigkakahaditan kaya kan mga opisyal an pagsupay kan tubig hale sa Yawa River na nag-aagi harani sa mga nasabing lugar siring kan nangyari kan bagyong Reming.
Maabot naman sa 400 na pamilya o labi sa 1,500 na indibidwal an nagtetenir ngonian sa mga evacuation centers sa nasabing banwaan.
Pigpapaberipikar naman kan opisyal an naresibeng report kan pigsasabing lapok na nagbubulos sa mga gullies o salog na konektado sa bulkan.
