LEGAZPI CITY-–Nakapagrehistro nin mga pagbabaha sa nagkapirang barangay sa Juban, Sorsogon huli kan mga naeksperyensyahang pag-uuran na dara kan shearline.
Segun ki Juban Municipal Disaster Risk Reduction Management Office Head Arvee Lodronio, sa intrevista kan Bombo Radyo Legazpi, huli kan pag-uuran an nagin abnormal an lebel nin tubig sa Cadac-an River na nagkawsa nin pagbaha sa nagkapirang lugar sa saindang banwaan.
Kabale sa nasabing lugar na binaha sa saindang banwaan an Barangay Calateo, Puting Sapa asin Rangas na kun sain makalihis man an pirang oras an naghupa man sana ini.
Afuera digdi, nakapagrehistro man sinda nin overflowing sa spillway sa Barangay Calateo asin partially damaged na harong huli sa natumbahan ini nin kahoy sa Barangay Buraburan.
Dugang kan opisyal na nairehistro man kan saindang opisina sa katahawan kan red asin orange warning o nasa boundary nin kritikal na lebel an Cadac-an River sa parte kan Barangay Binanuahan asin makalihis an pirang oras an bahagyang nang nagbaba an lebel kan tubig kaini.
Segun ki Lodronio na wara man sindang inebakwar na mga residentes alagad inabisuhan ninda an mga an mga barangay na mag-monitor asin magpreparar en kaso magkaigwa nin evacuation asin magpadagos an makusog na bulos nin uran.
Paliwanag man kan opisyal na kalimitan man na pigbabaha kada taon an nagkapirang lugar sa saindang banwaan huli sa ini an catch basin kan tubig na gikan sa mga pangenot na kabuludan sa segundo distrito kan provincia.
Mientrastanto, abiso man ni Lodronio sa namamanwaan na magtinir na mag-antabay sa mga lokal na sitwasyon kan saindang mga barangay, mag-monitor sa mga lehitimong ahensya na nagtatao nin patanid siring kan PAGASA, siring man na magsunod sa mga abiso kan barangay en kaso pigpapa-ebakwar, siring man na pwedesir na mag-apod sa saindang numero o emergency number sa panahon nin mga emerhensya.
