LEGAZPI CITY- Dae man nakasalbar sa hagupit kan bagyong Uwan an nagkapirang mga ataman na hayop sa provincia kan Albay.
Segun ki Albay Provincial Veterinarian Dr. Manny Estipona sa intrevista kan Bombo Radyo Legazpi na basado sa partial report kan nagkapirang mga lokal na gobierno, igwang mga nairehistrong duwang baka na nagadan sa banwaan kan Tiwi.
Afuera digdi, igwa man na mga ataman na native chicken an nagadan sa nagkapirang mga banwaan makalihis madistroso an kulungan kan mga ini sa kasagsagan kan pangrarapado kan raot nin panahon.
Pighahalat pa man an report hali sa iba pang mga lokal na gobierno.
Katakod kaini, sinabi ni Estipona na nakipag koordinar na sinda sa Department of Agriculture ngani na mapaghandaan an posibleng tabang na maitatao sa mga apektadong residentes na nawaran nin mga ataman na hayop.
