LEGAZPI CITY — Aminado an kapitan kan Barangay Lagundi sa banwaan kan Rapu-Rapu sa Albay na dati nang naimbwelto sa iligal na droga alagad klinaripikar na nagbagong-buhay na.
Sa eksklusibong intrevista kan Bombo Radyo Legazpi ki Kapitan Rogelio Boñon, taong 2016 kan magsurendir ini sa alkalde kan banwaan sa kasagsagan kan Oplan Tokhang kan Philippine National Police kun saen inako na naggamit kaito nin droga.
Dagdag pang nagin parte man kan programa kan alkalde tangarig na dagos nang talikdan an iligal na droga.
Naghapayag man nin pagkauyam an kapitan huli ta an mga tultol na opisyales an isinabay pa sa narco-list mantang wara man sa listahan an mga dae nagsuko asin padagos sa illegal drug trade.
Mientras tanto, wara man na planong mag-withdraw kan kandidatura si Boñon huli ta malinig an konsensya asin wara man na piggibong maraot.
Hagad man kan kapitan sa mga residente na dae magtubod sa listahan asin aramon muna an totoong istorya.
