LEGAZPI CITY — (Update) Suminakat na sa anom an numero kan mga nagadan sa nangyaring karambola kan 12 lunadan sa Barangay Busay, Daraga, Albay kun sain apat an idineklarang dead on arrival (DOA) kasuodma.
Binisto na kan mga otoridad an mga nagadan sa aksidente na sinda Sandy Bonsa, 41, driver kan motorsiklo; Gina Altavano, 46, asin an backride na aki na si Kathryn Altavano, 22; an pasahero kan tricycle na si Bvet Buendia, 45; asin John Patrick Nomo, 24, motorcycle driver mantang dae pa pigpapangaranan an driver kan dump truck.
Mientras tanto, presenteng pigbubulong sinda Salvador Alegre Jr, driver man kan saro pang truck; Jonathan Bajamundi, an pasahero ni Alegre; Rodolf Loterte, driver kan SUV; Arnel Luces, motorcycle driver; Antonio Nebres asin Jonel Perez, parehong tricycle driver; asin an bystander na si Flereda Miralpez.
Maswerte mang dae nagsapar nin lugad an duwang jeepney driver na sinda Gerald Romero asin Ricky Morillo, wing van driver Almario Toñacao, asin an bystander na si Jamine Noblez.
Sa ngonian, nagpapadagos pa an ipigsasagibong imbestigasyon kan mga otoridad katakod kan insidente.
