LEGAZPI CITY — (Update) Kinumpirmar kan PNP na kaibanan sa PRRD list o President Rodrigo Roa Duterte watchlist an barangay treasurer na nagadan sa ikinasang buy bust operation sa Brgy. 4, Bacacay, Albay.
Segun ki PC/Insp. Benito Dipad, hepe kan Bacacay Municipal Police Station, enot nang nagsurendir sa mga otoridad an suspek na si Erlan Mirabel alagad liwat na nagbalik sa pagpapabakal nin iligal na droga kun kaya ikinasa an operasyon na resulta kan mahigot na monitoring.
Pigbuyagyag pa kan opisyal na kaibanan an treasurer kan Brgy. Dinapa, Castilla, Sorsogon sa sarong grupo nin mga drug pushers siring man an Barangay Kapitan na ngunyan an nakakulong na man.
Ini man an ipigkokonsiderar na No. 1 sa Drug Watchlist sa banwaan kan Castilla.
Napag-araman na nagbibisita sana an suspek sa banwaan kan Bacacay huli ta yaon an saiyang live-in partner asin mga aki kan mangyari an operasyon na nagresulta sa ribayan nin putok sa pagultanan kan suspek asin mga pulis.
Mientrastanto, narekober man digdi an sarong calibre 38 na ginamit na armas asin an nasa 14 sachet nin pigtutubudang shabu.
Padagos man an pangapodan ni Dipad sa mga drug personalities na dagos nang magbalik sa tamang gawi asin ibitaran na an iligal na aktibidad kasabay kan pag-asegurar na warang dapat ikahandal an mga residente kan banwaan huli ta padagos an pagmamantenir kan katoninongan.
