LEGAZPI CITY- Pano nin kulog nin buot an naging mga pahayag kan pulis hale sa Pandan PNP sa probinsya kan Catanduanes makalihis ining ma-relieve sa posisyon.
Sa sarong intrevista, inilatag ni PO1 Dan Bagay an kulog kan buot kaini urog na sa mga opisyal kan pulis na pigtutubudan kaining may kinaaraman sa pagkaka-relieve saiya.
Segun sa pulis, warang problema sa reassignment alagad tinawang duon kaini na wara suboot na “legal ground” an ginibong lakdang laban saiya kun saen kwinestiyon pa kaini an nagibong sala na iyong mataong hustisya kan transfer kaini pasiring sa Camp Simeon Ola sa Legazpi City.
Dugang pa ni Bagay na imbes na onra an makua hale sa pigseserbihang organisasyon, naikaag pa ini sa difisil na sitwasyon.
Marurumdumang saro si Bagay sa nagpartisipar asin nangenot sa nagkapirang matrayumpong operasyon sa Bicol kasabay na an pagkakarekober kan 71 bloke nin shabu na nagkakantidad nin P2.1 million kun saen nakaresibe pa ini nin Medalya ng Kagalingan, pagkakasabat sa labi P1 million na kantidad nin mga narra lumber asin mga anti-illegal fishing, illegal gambling asin illegal drugs operations.
Sa ngunyan, pighahalat pa an magiging reaksyon ni PNP Bicol Regional Director, PC/Supt. Melvin Buenafe sa nasabing isyu mantang nagsumite na nin resolusyon an Sangguniang Bayan kan Pandan ngane maibalik si Bagay sa nasabing banwaan na saro suboot sa mga naghahatod nin kumpiyansa asin tiwala kan mga tawo sa mga pulis.
Aminado man an nasabing pulis na difisil an sitwasyon kaini ngunyan alagad naglalaom man liwat ini sa honestong imbestigasyon.
