LEGAZPI CITY – Bukas na giraray sa pagbisita kan publiko an Museo de Legazpi puon Marso 2.
Ini an bilang pagsunod sa anunsyo kan city government na magbubukas na an mga tourism sites sa Legazpi ngani padiit-diit nang makabangon an nasabing industriya na pinadapa kan pandemiya.
Segun ki Darlito Perez, museum curator sa intrevista kan Bombo Radyo, diit pa an mga nagbibisita sa mga exhibit alagad nagtagama nin sarong semanang pag-obserbar huli ta posibleng dakol pa an dai nakakaaram na balik-operasyon na sinda.
Puon alas-9:00 nin aga hasta alas-4:00 nin hapon an operasyon kan museo mantang dai malagpas sa 20 katawo sana an tutugutan sa laog.
Pig-iisipan man an pagdadagos na kan mga nakanselang exhibits na sisiertuhon na naka-otob sa eksistidong minimum health protocols.
Sa presente, dating display an naka-exhibit alagad posibleng mabago ini sa pagtatapos kan bulan.
Kasabay kan pagbubukas kan museo, naglunsar man nin programa an City Tourism Office kun sain pwedeng maka-claim nin “Ibalong bags” an partisipante.
Ngani makaentra, kaipuhan sanang magkuwa nin Legazpi passport sa tourism office, magkuwa nin ladawan sa lugar na papasyaran sa ciudad, i-upload asin ipahiling sa museo ngani na ma-claim an bag.
