LEGAZPI CITY – Karsel an bagsak kan pigkokonsiderang sarong Municipal Most Wanted Person kan Placer, Masbate asin an saiyang tugang makalihis madakop kan mga otoridad.
Segun ki Placer Municipal Police Station Officer-in-charge Police Major Michael Albania sa intrevista kan Bombo Radyo Legazpi na binisto an Most Wanted Person na si alyas “Carl”, 20 anyos, warang agom, estudyante, mantang an saiyang tugang an may edad 27 anyos, warang trabaho, warang agom asin parehong residente kan Brgy. Pili, kan kaparehong banwaan asin provincia.
Igwa suboot sindang warrant of arrest huli sa kasong rape na may kinaaraman sa RA 7610 o iyo an Special Protection of Children Against Abuse, Exploitation and Discrimination Act mantang pig-enganyar ninda an saiyang tugang na boluntad nang magsuko sa pulisya.
Nagpoon an kaso kan suspetsado kan luguson ninda an saindang kapitbahay na menor de edad kun kaya warang pyansang ipigbugtak sa saindang kaso na para kuta sa saindang temporamenteng libertad.
Pigtaram pa kan opisyal na magkasunod na aldaw an pagkakadakop kan magtugang asin dae na nagporbar na maglaban sa mga pulisya.
Sa presente, nagtetenir sa kustodiya kan Placer MPS an magtugang na suspetsado para sa magkakanigong disposisyon.
Nangapodan man si Albania sa publiko na dae magduwang isip na magdulok sa mga pulisya kun may naaaraman sindang impormasyon nganing makatabang sa pagmamantenir nin pazy orden sa saindang lugar.
