LEGAZPI CITY – Warang nairehistrong pagyugo sa Mt. Bulusan sa probinsya kan Sorsogon an seismic monitoring network alagad nagkaigwa nin maluyang mga pagbuga nin abo na uminabot sa 200 meters an langkaw hali sa mga active vents.
Base sa pinakahuring bulletin kan Philippine Institute of Volcanology and Seismology (Phivolcs), igwa man na nairehistro na pagbuga nin suldur dioxide (SO2) na uminabot sa average na 372 tonelada sa kada aldaw.
Hasta sa ngunyan an mantenido sa Alert Level 1 an nasambitan na bukid asin padagos na pigbabantayan an mga posibleng aktibidad kaini.
Marurumduman na kan nakalihis na Lunes, nagkaigwa nin mild phreatic erruption an Bulusan alagad tulos man na hinali kan Phivolcs an pagkahandal kan publiko.
Mientrastanto, ipinagirumdom man kan lokal na gobyerno kan Sorsogon an publiko na dae maglaog sa 4-kilometer radius Permanent Danger Zone huli sa posibilidad na magkaigwa pa nin mga panibagong phreatic eruption.
Nag-abiso na man an aviation authorities sa mga piloto na ibitaran na magpalayog harani sa nasambitan na bulkan para sa seguridad kan mga ini.
