LEGAZPI CITY- Pormal nang ibinaba sa Alert Level 0 o normal status an kondisyon kan Bulkang Bulusan sa provincia kan Sorsogon.
Susog sa ibinabang volcano bulletin kan Philippine Institute of Volcanology and Seismology (PHIVOLCS), naobserbaran an kabilugang pagbaba sa mga parametrong pigbabantayan.
Kaibanan sa mga ini an pagbaba kan volcanic quakes sa baseline level o 0-3 sa laog kan limang bulan, dagos-dagos na pag-impis susog sa electronic tilt asin GPS data, pagbaba kan ipigbubugang gas siring man an pagkawara kan degassing activity sa mga aktibong pasangawan o vents.
Ipigpapakahulugan man kan notice kan PHIVOLCS an pagbabalik kan observational parameters sa baseline o background levels asin warang nahihiling na papasakat na magma na posibleng magcausa nin pagputok sa ngonian.
Napag-araman na kaitong Hunyo 5 pa nairehistro an pinakahuring phreatic eruption sa nasabing bulkan.
Mientras tanto, klinaripikar kan ahensya na pwede pa man giraray na isakat an alert status en kaso magkaigwa nin “renewed increase” sa mga parametro.
