LEGAZPI CITY – Gadan an sarong persona sa nangyaring banggaan kan duwang behikulo sa Barangay 18 – Cabagnan, Legazpi City.
Segun ki Legazpi City Police Station Public Information Officer Police Executive Master Sergeant Carlos Paña sa intrevista kan Bombo Radyo Legazpi na nangyari an aksidente bandang 3:44 nin maagahon kan Hulyo 1, 2025.
Basado sa saindang imbestigasyon an pigbabaybay kan duwang motorsiklo an mag-inibong na linya kan tinampo kan oras na mangyari an insidente.
Nagporbar na mag-overtake an sarong motorista sa sarong behikulo rason alagad nakalipat ini sa ibong na tinampo na nagresulta man sa head-on collision kan kasabatan man na motorista.
Mahihiling man suboot sa ipinaluwas na kopya kan CCTV footage an wasak an duwang motorsiklo asin nagkalat an debree huli sa kusog kan impact kan banggaan.
Pigtaram pa kan opisyal na parehong pigdara an mga biktima sa haraning hospital alagad binawian nin buhay an nag-overtake na driver mantang padagos na nagpaparahay an nabangga kaini.
Sa presente, padagos an ipigsasagibong imbestigasyon kan saindang ofisina mapadapit sa nangyaring aksidente.
Sa kabilugan, ini na an saindang ikatulong nairehistrong aksidente sa tinampo ikinagadan kan driver ngonian na taon asin mawot nindang dae na ini madugangan pa.
Pagirumdom ni Paña sa mga driver asin motorista na permihang mag-iingat sa pagmamaneho mantang dae na magporbar magmaneho enkaso nasa impluwensya nin arak asin permihang icheck an sadiri siring man an saindang mga behikulo.
