Sinabi kan Philippine Coast Guard na nagbalik an monster ship kan China sa dating lokasyon kaini harani sa kostales kan Zambales, na sarong provincia sa West Philippine Sea.
Ini nagkapirang aldaw sana makalihis maghali an nasabing barko sa lugar.
Segun ki Philippine Coast Guard for the West Philippine Sea spokesperson Commodore Jay Tarriela na an China Coast Guard 5901 an nagribay sa CCG-3304 na nakaposisyon sa 180 kilometers kan Zambales.
Bahagya man na naharang kan pinakadakulang barko kan ahensya na BRP Teresa Magbanua an nasabing barko kan China.
Segun sa opisyal na an strategic maneuvering kan BRP Teresa Magbanua an nagbusol sa People’s Republic of China na mag-deploy kan China Coast Guard 5901 “monster ship.”
Nanindugan man si Tarriela na warang intimidasyon kan China Coast Guard an makakadaog sa dedikasyon kan Philippine Coast Guard.
