LEGAZPI CITY- Ipinangapudan ni ACT Teachers Partylist Representative Antonio Tinio na dagos nang mahali sa pwesto si Gabriel Go, an pamayo kan Special Operations Group – Task Force for Road Clearing (SOG-TFRC) kan Metropolitan Manila Development Authority (MMDA).
Ini makalihis mag-viral an isyu kan pagsita kan nasabing opisyal sa sarong paratukdo na nagmamaneho nin motorsiklo na warang helmet.
Marurumduman na sa nasabing video, nakiolay an paratukdo na dae na siya pag-videohan alagad ipinagpadagos man liwat ini kasabay kan payo ni Go na dae na sana pagsambiton an pangaran kan hinarang na motorista.
Segun ki Rep. Tinio sa intrevista kan Bombo Radyo Legazpi na igwang obligasyon an lambang public servant o law enforcer na itrato an gabos na igwang pagrespeto asin pagpapakumbaba.
Tinuyaw man kan kongresista an nasabing video na nasa facebook page ni Go asin kinuwaan suboot mantang siya an nasa oras nin trabaho asin pigigibong personal content para sa personal na kapakinabangan.
Segun ki Tinio na binayolar kan opisyal an privacy kan nasabing paratukdo.
