Arestado an sarong lalaki makalihis bugbugon an saiyang agom huli sa pagtanggi kaining magtao nin kwarta na suboot gagamiton sa pagbakal nin shabu sa Poblacion Pardo, Cebu City.
Binisto an suspek na si Arnold Navares, 48-anyos, na naggamit suboot nin metal pipe nganing kulugan an saiyang agom na si Mercedita, 50-anyos makalihis na sabihon na wara ining itatao saiya na kwarta.
Basado sa mga awtoridad, sa sobrang dagit, rinaot pa ni Navares an pirang parte kan saindang harong antes bugbugon an biktima sagkod mawaran ini nin malay.
Sa tabang kan mga kataraid, nagsumbong an biktima sa mga awtoridad na tulos na nagresponde asin inarestar an suspek.
Sa istasyon kan pulis, naghagad nin dispensa si Navares asin nagpromesa na dai na niya uuliton an saiyang ginibo.
Nahahampang si Navares sa kasong pagbalgar sa Republic Act No. 9262, o Anti-Violence Against Women and Their Children Act of 2004.
