LEGAZPI CITY-Nanotaran an minor landslide o dikit na pagrasay nin daga sa Barangay Lourdes sa banwaan kan Tiwi Albay.
Segun kay Municipal Disaster Risk Reduction and Management Office Head Engr. Manuel Damo na nanotaran ninda sa saindang paglilibot an diit na parte kan narasay na daga sa nasambitang lugar.
Dai man suboot ini nakaokopar sa mga tinampo o awto asin dai man nin mga kaharongan sa area.
Paliwanag kan opisyal na kawsa ini kan padagos na paguuran asin paghiro kan nagkapirang tinanom sa lugar.
Dagdag pa niya na pinagkokonsidera kan lokal na gobierno an lugar bilang ‘susceptible’ sa landslide kaya piglalaoman na ninda ini asin tulos na pinaebakwar an mga residente harani digdi.
Nasa 642 household man suboot an kinakaipuhang mailipat sa relocation area ngani dai na magkaigwa nin problema sa pagpapaebakwar gikan sa mga susceptible landslide area.
Pagirumdom kan opisyal orog nang padagos an makukusog na paguuran, na magtenir muna sa mga evacuation center partikularmente na sa mga high risk sa landslide magin sa pagbabaha.
