LEGAZPI CITY-Nagtitinir man giraray sa P310 an minimum wage sa rehiyong Bicol sa ibong kan mga pagmahal sa presyo kan barakalon epekto kan coronavirus disease pandemic, outbreak nin African Swine Fever asin mga nag-aging bagyo sa nasyun.
Sa intrevista kan Bombo Radyo Legazpi kay Raymond Escalante kan Regional Tripartite Wage and Productivity Board kan DOLE Bicol, Pebrero kan nakalihis na taon kan nakatalaan na kutang langkawan sa P325 an minimum wage sa rehiyon sa paagi kan wage order number 20 alagad dae na nadagos pa an implementasyon kaini huli sa ipinaotob na quarantine.
Aminado an opisyal na dakol na mga negosyo an labing nadidipisilan sa ngunyan mantang an iba an nalulugi pa huli sa pandemya kung kaya dae muna maipaotob an nasabing wage increase.
Ngunyan na Enero 22 kan pigtalaan naman an consultation kan DOLE sa mga stakeholders ngani na idagos na an pagpapaotob kan wage order alagad nagputok naman an bareta sa paglaog kan bagong variant nin COVID 19 sa nasyun na B.1.1.7 kung kaya liwat ining naoktaba.
Sa ngunyan, pinagpaplanohan pa kan RTWPD-DOLE kung nuarin talaga ipapaotob an dagdag na sahod sa rehiyon alagad kaipohan na ikonsidera an kondisyon kan mga negosyo ngani na dae magdugang sa pagkalugi kaini.
