LEGAXPI CITY-Nakapagrehistro nin minimal ashfall an Municipal Disaster Risk Reduction and Management Office sa Guinobatan Albay poon kasuudma hasta ngonian na aldaw.
Segun kay Guinobatan MDRRMO Head Joy Maravillas intrevista kan Bombo Radyo Legazpi, na nanotaran an mga ‘traces’ nin ashfall sa parte kan Mayon unit area.
Dagdag pa kan opisyal na sa presente nakapagebakwar na an mga apektadong residente na nakatenir sa 6km permanent danger zone partikularmente na sa Barangay Muladbucad.
Nasa 3, 627 na pamilya o 10, 042 na mga indibwal an posibleng i-ebakwar sa apat nindang barangay na laog sa 7-8km extended danger zone enkaso mag-escalate pa an estado kan Bulkang Mayon.
Kabale sa mga barangay na ini an Barangay Masarawag, Barangay Muladbucad Pequeño, Barangay Muladbucad Grande, Barangay Doña Tomasa.
Pigkakahaditan man suboot an mga lahar flow sa may parte kan Barangay Tandarora asin Barangay Maninila enkaso magsakat sa alert level 4 an Bulkang Mayon.
Sa presente, pigaabisuhan an gabos na magsulot na nin facemask para sa saindang seguridad.
