LEGAZPI CITY- Hinigotan pa kan mga suldado sa Kabikolan an operasyon katakod kan kasuguan ni Presidente Rodrigo Duterte na pagpuho sa lawless violence, siring man sa mga posibleng lakdang kan New People’s Army (NPA) sa paparaning anibersaryo kan mga ini.
Ipighayag ni 903rd Infantry Brigade Commanding Officer B/Gen. Greg Almerol sa intrevista kan Bombo Radyo Legazpi na resulta kan nangyaring combat patrol operation sa pangengenot kan 2nd Infantry Batallion kan Philippine Army an engkwentro sa Brgy. Cabasan, Aroroy, Masbate kasubagong aga kasabay kan komemorasyon sa heroismo ni Gat. Andres Bonifacio.
Nagbungkaras an 10-minutos na bakbakan sa pagultanan kan tropa kan gobierno asin poco mas o menos pitong armadong kalalakihan na nagresulta sa pagkagadan ka pigtutubudang miembro kan NPA asin pagkakarekober kan sarong claymore mine asin caliber 45 na badil.
Segun pa sa opisyal, kaibanan an mga naka-enkwentro sa nagkaira pang mga miembro kan mga rebelde sa lugar makalihis na enot naman na magsuko an 126 NPA members sa Masbate.
Inengganyar man ni Almerol an iba pang magbalik-loob na sa gobierno asin isurendir an mga bitbit na armas kasabay kan pagresibe nin tabang sa paagi kan Enhanced-Comprehensive Local Integration Program (E-CLIP).
