LEGAZPI CITY- Sunod-sunod an mga nangyayaring engkwentro kan militar asin kan rebeldeng New People’s Army (NPA) sa probinsya kan Sorsogon.
Kasuudma an pinakahuri kun sain nagadan an sarong miyembro kan bandido na pigtutubudan na mga dayo man sana sa lugar.
Sa ngunyan, sinabi ni Col. Fernando Trinidad, commanding officer kan 903rd Infantry Brigade kan Philippine Army na pig-aaram pa ninda an pagkabisto kan nalagas na NPA member makalihis an 20 minutos na bakbakan.
Nagtutubod si Col. Trinidad na nagsasagibo nin extortion activities an mga ini huli ta nadidipisilan pang mag-adjust sa lugar.
Ngani na mapakusog pa an pwersa kan militar kontra sa mga bandido, sinabi kan opisyal na nagdugang sinda nin saro pang tropa sa Sorsogon.
Inako man kaini na talagang mawot ninda na magkaigwa nin orolay pangkatoninongan sa pagultanan kan gobyerno asin kan mga rebeldeng grupo alagad hasta sa dae pa suboot nag-aanunsyar nin ceasefire, padagos man giraray an saindang mga operasyon.
Dugang pa ni Trinidad, kun dae magin matrayumpo an orolay na ini, “willing” sya na magkaigwa nin localized peacetalks ngani na dagos nang maresolbaran an problema sa terorismo asin iba pang danyos na kawsa kan NPA sa saindang hurisdiksyon na probinsya.
