LEGAZPI CITY – (Update) Haloy na suboot na nakaabot sa pandangog kan New People’s Army an impormasyon dapit sa nakomiter na kasalan kan retiradong pulis na siya man na pigpepensar na rason kun nata ini ginadan.
Magigirumduman na kan nakaaging Sabado, Hunyo 3 kan pagbabadilon-gadan si Emory Garil, 63-anyos na residente kan Brgy. Culasi, banwaan kan Matnog, Sorsogon mientras na nagsasagob ini nin tubig sa haraning water source.
Limang armadong kalalakihan an suminakyada sa biktima kun saen duwa sa mga ini an nagpaputok nin badil na tuminama sa manlaen-laen na parte kan lawas kaini asin mitsa kan tulos na pagkagadan.
Sa nagunong impormasyon kan Bombo Radyo Legazpi gikan sa Matnog Municipal Police, bulan kan Marso ngonian na taon kan maresibe man kan hepatura an sumbong kan panunutok nin badil ni Garil sa dae nabistong lalaki na residente kan Brgy. Sinalmacan.
Dugang pa kan sumbong na binalo pa kaining kuhaon an nagkapirang sako nin paroy kun saen pigkaklamar na pagsadiri niya an pinagtanuman kaini.
Kan Marso 30 man kan suboot dukuton ini asin tawanan nin huma kan mga pigtutubudang miembro kan NPA sa residencia alagad pig-release man sana sa Brgy. Bon-ot Saday kasabay kan pagkumpiskar sa badil kaini.
Sa presente padagos pang pighahanap kan mga otoridad an mga nasabing suspetsado.
