LEGAZPI CITY- Magpapapod kan meeting an Mines and Geosciences Bureau (MGB) sa Bicol sa monitoring kan quarry operations sa Lunes, Setyembre 24.
Katakod kaini kan direktiba ni Environment Secretary Roy Cimatu sa pagsuspinde sa gabos na quarry operations sa Region 1, 3, 4A, 7, 11, 10, 13 kaibanan na an Bicol.
Sa ekslusibong intrevista kan Bombo Radyo Legazpi ki MGB Bicol Director Engr. Guillermo Molina Jr., aminado bako kaibanan sa pagbusisi kan ahensya an safety evaluation sa mga quarry site huli ta nasa pag-aram sa legalidad kan operasyon an pinakatutok.
Sa inspeksyon nin ahensya kaitong Hunyo ngonian na taon, nagkapira sa mga operators an nahilingan nin mga pagbayolar sa Evironmental Compliance Certificate (ECC) mantang igwa pang binabaan nin Cease and Desist Order sa operasyon hale sa Camarines Sur asin Catanduanes.
Madalagan man an pagdiskutir sa laog kan 15 aldaw asin susuratan na man an local government unit tangarig na ipundo muna an mga operasyon mantang piglalaoman man na maide-deploy na an mga personahes para sa re-assessment ngonian na maabot na Martes.
Hihilingon kan monitoring team kun igwang similar condition an cement quarry sa Bicol asin Naga City, Cebu tangarig maibitaran an katakod na pangyayari.
Ipigduon pa kan direktor na igwa pa nin supervisory role an ahensya dawa nasa LGU na an direktang pagmamanehar sa quarry issues susog sa Local Government Code of 1991.
