LEGAZPI CITY- Dae pa nag-aagi sa auditing an tulong kumpanya nin minahan sa probinsya kan Albay kun kaya dae pa maaraman kun igwa digding maipapasarado an Department of Environment and Natural Resources (DENR.)
Ini an pahayag ni Danny Molina, Regional Director kan Mines and Geosciences Bureau (MGB) Bicol.
Sigon ki Molina, igwa nin tulong minahan sa probinsya na iyo an Rapu-Rapu Polymetallic Mine, Ibalong Resources and Development Corporation sa Camalig asin an Perlite Manufacturing sa Lamba Legazpi City.
Sa presente, nasa re-maintenance status an minahan sa isla kan Rapu-Rapu huli ta dae pa natatawanan nin pondo gikan sa Contingent Liability and Rehabilitation Fund Steering Committee kan ahensya.
Sarong taon na suboot ining nasa siring na status na enot nang ipigsairarom sa rehabilitasyon.
Dugang pa ni Molina, nagpapadagos an saindang pag-monitor sa mga nasambitan na minahan katabang na an Environmental Management Bureau (EMB) asin iba pang katakod na ahensya de gobyerno ngani na masiertong nag-uutob an mga ini sa mga ipigtalaan na mining regulations.
