Sarong Chinese tanker hale sa Estados Unidos an nag-agi sa Strait of Hormuz kan Martes sa ibong kan blockade kan Estados Unidos sa naunambitang chokepoint, segun sa shipping data.
An tanker na Rich Starry iyo an pinakaenot na nakalusot sa strait asin nakaluwas sa Gulf poon kan magpoon an blockade, basado sa datos gikan sa LSEG, MarineTraffic asin Kpler.
An barko asin an kagsadiri kaini na Shanghai Xuanrun Shipping Co Ltd, an pinatawan nin padusa kan Estados Unidos huli sa mga pakikipagtransaksyon sa Iran.
An Rich Starry an sarong medium-range tanker na may kargang poco mas o menos 250,000 na bariles nin methanol.
Ikinarga kaini an nasabing produkto sa huring pinaghalean na pantalan kaini sa Hamriyah sa United Arab Emirates.
Segun sa datus, pagsasadiri an tanker kan mga Tsino asin puro man Chinese an mga tripulante na sakay kaini.
Mientrastanto, saro pang tanker na nasa irarom kan mga padusa kan Estados Unidos, an Murlikishan, an naglaog man sa Strait of Hormuz kan Martes.
Piglalaoman na makakarga ini nin fuel oil sa Iraq sa Abril 16.
An barko, na dati nang inapod na MKA, nakapagdara man nin langis hale sa Russia asin Iran.
