Nagpulasan an mga turista makalihis biglang magbuga nin mahibog na aso asin abo an Mount Etna sa Italy.
An eksena tulos na nagin viral online sa social media.
Mahihiling sa video na ipigheras ni @aurelienpouzin sa social media platform na X o dating Twitter an ginatos na turista sa gilid kan bulkan mantang sarong dambuhalang mala panganuron na abo an buminalot sa kalangitan.
Mantang an pira an nagtenir na nakatindog nganing saksihan an pambihirang tanawin, kadakol an nagdalagan pababa kan bulod.
MAdadangog man sa video an ugong kan pagputok mantang rinibong toneladang gapo asin abo an ibinuga kan bulkan.
Magigirumduman na an Mount Etna an sarong aktibong bulkan sa sirangang parte kan Sicily na taon-taon an dinarayo kan pigkakarkulong nasa 1.5 milyong turista.
Sa ibong kan peligro, kadakol na nagbibisita nganing masilayan sana an kagayunan kaini.
Segun sa mga eksperto, an nangyari an sarong Strombolian eruption na sarong klase nin pagputok na halikpot alagad makusog, asin nagluwas nin mga “fire fountain” o bugso nin kalayo, abo, asin darakulang tipak kan gapo.
Mientrastanto segun sa local media uminabot an ashfall kaini sa lugar kan Piano Vetore asin may mga nairehistro mang saradit na pag-bulos kan lava pasiring sa Valle del Bove.
Basado sa National Institute of Geophysics and Volcanology (INGV) kan Italy, piglalaomang malakop pa an ashfall kaini pasiring sa west-northwest kan nacion.
Halangkaw man suboot an presenteng seismic activity kan bulkan.
