LEGAZPI CITY- Bawal na muna an mga igwang shrimp o seafood allergy urog na kun ihahatag na an darakula asin masisiram na mga buyod sa nagpapadagos na selebrasyon kan Pamasayan Festival sa ‘Gateway to the Panay Islands,’ an banwaan kan Mandaon, Masbate.
Dagsa na an mga lokal asin dayuhang turista sa naging pagbubukas kan kapiestahan sa enot na aldaw kan Marso kun saen kasabay sa mga inabangan an parada kan mga darakulang bersyon kan paboritong ‘pasayan’ sa float parade mantang dawa pa tirik na tirik an saldang, nagpatalbugan man giraray sa streetdance competition an mga partisipante sa magagayon na steps asin makokolor na costumes kun saen naiuli kan undefeated Cleofe A. Arce Memorial High School (BURI) an championship.
Highlight pa sa kapiestahan an mga kawat na nakasentro sa dagat siring man an sabay-sabay asin padarakulan na pagdakop kan mga darakulang pasayan mantang dae man nalingawan kan mga lokal na opisyal an pagmamantenir kan mabaskog na salud kan mga residente sa isinagibong medical asin dental mission kun saen nagkaigwa pa nin implanon insertion sa 200 na kababaihan siring man an pagdonar nin dugo.
Mientras tanto, makikiogma man an nagkapirang mga local celebrities siring na sana kan grand champion kan reality singing competition sa telebisyon na si Mitoy Yonting kasabay an Drayber’s Band asin dakol na iba pa.
An Pamasayan Festival an taunang selebrasyon sa pag-orgulyo asin pagpapasalamat sa Kagurangnan sa naiaambag na ganansya asin pagtalubo sa ekonomiya kan mga nagkakadarakop na hipon kan mga parasira.
