LEGAZPI CITY — Dae man suboot maaapektaran nin maray an mga paraoma ngunyan na summer season.
Segun ki Agriculturist Cheryl Rebeta kan Provincial Agriculture Office (PAO), naani na kan mga paraoma an saindang tanom na paroy kun kaya bako ini apektadong marhay kan kakulangan nin tubig ngunyan na tag-init.
An mas apektado suboot ngunyan iyo an mga paratanom nin gulay huli sa bako bastanteng suplay nin tubig.
Posible kaya suboot na magadan an tinanom na gulay urog na an mga sensitibo sa init.
Sinabi ni Rebete na kaipuhan na bugtakan nin shade ngane na bako direktang matamaan nin init.
Sinabi pa kan opisyal na hinarali asin sinulo na man an mga paroy na nagkaigwa nin peste sa syudad kan Ligao asin banwaan kan Polangui ngane na dae na maglakop pa sa ibang mga paroy.
Pineste kaya suboot an mga tanom nin brown leafhopper kun saen nagagadan an tanom kun matugdunan kan peste.
Mientrastanto, ihineras man kan opisyal na nagpapadagos an saindang cacao production program kun saen kaipuhan sana suboot na magpalista kan mga paraoma ngane na matawanan nin libreng 500 na cacao seedlings sa kada sarong ektaryang daga.
