Nagpasiring sa Korte Suprema an nagkapirang mga supporters ni dating Presidente Rodrigo Duterte nganing enganyaron an mga mahistrado na magpaluwas nin resolusyon dapit sa mga pendienteng petisyon kan dating presidente.
Hinagad ninda sa Korte Suprema na tulos na ibalik si Presidente Duterte sa nasyon, urog nang sa pagheling ninda, bako tama an pagdakop saiya.
Kabale an mga nasabing indibidwal sa “Tay, Kami Naman” signature campaign kun sain nagkokolekta sinda nin mga pirma nganing kumbinsihon an SC na magdesisyon sa pendienteng kaso na may kinaaraman sa pag-arestar ki Duterte.
An lakdang an kasunod kan nakatalaan na pagpoon kan confirmation of charges hearing laban sa dating presidente sa International Criminal Court (ICC) para sa kasong crimes against humanity.
