LEGAZPI CITY – Pwede ng makapag-avail kan mga serbisyo kan Maritime Industry Authority online sa paagi kan saindang binuksan na website.
Ini an Maritime Industry Authority Integrated Seafarers Management Online (MISMO) System.
Segun kay Atty. Maximo Bañares an Regional Director kan Maritime Industry Authority Bicol, pigkrear an website ngani na matabangan an mga Pinoy seafarers sa pag-aasikaso kan saindang mga dokumentos na kaipohang iproseso sa ahensya.
Kaipohan sana na magpasiring sa online-appointment.marina.gov.ph asin pwede ng magsumitir kan mga kaipuhan na dokumentos para sa aplikasyon theoretical exams.
Pwede man na i-check kung lehitimo an lalaogan na agency, magkua nin Certificate of Proficiency asin iba pa.
Segun kay Bañares, saro sana ini sa mga piggigibong lakdang kan ahensya ngani na mapadali an trabaho kan mga Pinoy seafarers na nagtatiyaga na magtrabaho sa ibang nasyun, harayo sa saindang mga kaparientes sa Pilipinas.
Sa mga masunod na taon target kan Maritime Industry Authority na dagdagan pa an functions kan website ngani na magamit naman ini sa pagproseso kan mga dokumentos kan may kagsadiri nin barko asin bangka.
