LEGAZPI CITY – Binulabog nin bomb scare an mga residente kan Rosero St., Corner Mabini St, syudad kan Masbate.
Sa impormasyon na naguno kan Bombo Radyo Legazpi, napag-araman na sarong empleyado kan LGU-Masbate City na nabistong si Ruben John Lalaguna an nagpaabot nin impormasyon sa mga otoridad.
Huli digdi, tulos man na nagpasiring sa lugar an mga tauhan kan Masbate City Police ngani na maberipika an nasambitan na impormasyon.
Katakod kaini, tulos man na nagbugtak nin barikada asin command post an mga otoridad sa lugar mantang pighahalat an pag-abot kan Explosive and Ordinance Team kan Masbate Police Provincial Office ngani na maberipika an nasambitan na pampasabog.
Mientrastanto, tulos man na nagsagibo nin aksyon an EOD team sa pangengenot ni PSI Alfredo Lastrella alagad en vez na pampasabog, sarong lighter sana an tuminambad sa mga otoridad.
Nasa pangangataman na ngunyan kan EOD responding team an nasambitan na lighter para sa magkakanigong disposisyon.
