LEGAZPI CITY – Pinag-iingat kan City Disaster Risk Reduction Management Office an mga residentes sa ciudad nin Legazpi sa posibleng mga pagbaha asin landslide ngunyan na may pigbabantayan na Low Pressure Area.
Sa intrevista kan Bombo Radyo Legazpi kay Engr. Miladee Azur an head kan Legazpi City Disaster Risk Reduction Management Office, maski na harayo pa an raot nin panahon, namamatian na an makusog na pag-uran na dara kaini.
Kasuodma sana kan makapagrehistro na nin pagbaha sa mga barangay kan Buraguis, Mauyod asin Peñaranda huli sa halawig na oras nin pag-uran.
Mahigot naman na pigbabantayan an ahensya an mga mabulod na parte kan Legazpi kung sain posibleng magkaigwa nin landslide.
Segun kay Azur, naabisohan na an mga barangay officials na bantayan an sitwasyon kan saindang lugar asin tulos na magpaotob nin preemptive evacuation kung kinakaipohan.
Sa mga residentes man, abiso kan opisyal na magsunod sa mga patanid kan lokal na gobyerno asin ihanda sana an gamit sa posibleng pag-ebakwar lalo na kung nakaistar sa landslide asin flood prone areas.
