LEGAZPI CITY- Ikinaogma kan Philippine Army an nagdadakol pang numero kan mga miyembro kan New People’s Army (NPA) na nagsusurinder asin nagbabalik loob na sa gobyerno.
Sa intrevista kan Bombo Radyo Legazpi kay Capt. John Paul Belleza kan 9th Infantry Division Public Affairs Office Philippine Army, ngunyan sanang taon nag-abot na sa 50 an mga nagrurinder na rebelde na pigtatabangan na kan gobyerno ngani na makapagbagong buhay.
Kadaklan suboot sa mga ini an hali sa provincia nin Masbate na napagdesisyonang tapuson na an madugong pakikibaka ngani na magkaigwa nin matoninong na buhay.
Kaiba sa mga rason kan mga dating NPA sa saindang pagsurinder an kamawotan na makaibanan na an mga kaparientes, naengganyar kan pag-iribang nagsurinder naman, pagkahandal sa saindang seguridad huli sa mga operasyon kan suldado asin an iba an nagimata na sa salang idolohiya kan grupo.
Naglalaom an opisyal na magpapadagos pa an magayon na development na ini asin nangangapudan sa iba pang mga miyembro kan NPA na magsurinder naman asin tulos na tatabangan ngani na magkaigwa nin mas maray na futuro.
